Rashōmon e outros relatos, de Ryūnosuke Akutagawa

Pai do relato moderno xaponés, Ryūnosuke Akutagawa naceu o 1 de marzo de 1892 en Irifune, no barrio de Kyōbashi, en Toquio. A enfermidade mental da nai, manifestada pouco despois de nacer el, levaría á súa adopción por parte dun tío materno, e marcou a súa vida toda.

Refuxiado desde neno na lectura, coñecerá de primeira man os clásicos chineses e xaponeses, así como autores occidentais da altura de Baudelaire, Strindberg, Poe, Tolstoi ou Wilde.

En 1913, comezou a estudar literatura inglesa na Universidade Imperial de Toquio. En 1914, na revista Shinshichō, que revivira con compañeiros de estudos, empezou a publicar a súa obra. Foi noutra revista literaria onde publicaría «Rashōmon», o seu segundo relato. A crítica negativa dos seus compañeiros causoulle unha crise da que só conseguiría saír tras visitar o seu ídolo Natsume Sōseki. Ese encontro e os eloxios que Sōseki lle dedicou fortaleceron a súa vocación. Os seguintes relatos que publicou foron ben acollidos pola crítica; ao longo da súa vida, escribiu máis de cento cincuenta. Ambientados nos diferentes períodos da historia xaponesa (Heian, Edo e Meiji), os seus relatos actualizan temas clásicos e episodios históricos, non sen influencias occidentais.

Unha viaxe á China para traballar de reporteiro provócalle numerosos problemas de saúde que, sumados a un fráxil equilibrio mental, o levan, tras anos de reclusión, ao suicidio en 1927, á idade de trinta e cinco anos.

Preme nas lentes para ler as primeiras páxinas.